تصاريحنا معانا.. دفعة 4 أجازات
هانفارق العدس والجراية وشوية الفولات
جايلك يا أمه حمرى الفرخات
وعنك يا ابه هاروى الزرعات
فجأة نادانا الصول: ثابت بوابات
تمام يا أفندم تمام يا بشوات
البيه قالنا البلد فيها مؤامرات
عيال خونة مالينها مظاهرات
نزلنا الشارع نأدب الخاينين
لقينا افندية بيقولوا إحنا عليكوا خايفين
إحنا إخواتكم وعشانكوا نازلين
لقينا بنات زى الفل والياسمين
بينادوا حرية, عدل, كرامة للمصريين
ده جدع شبه يوسف واد عمى
بيقول يابلدى فداكى روحى ودمى
ترابك عليا غالى ودمعتك همى
كل المصايب تهون إلا جرحك يا أمى
وديه صبية من البنات المصراوية
ست الحسن زى ما وصفتها الأغنية
بتصرخ وتقول سلمية سلمية
ويامصر إحنا معاكى وهانكسب القضية
وده راجل كبارة على وشه النور باين
بيصرخ ويقول يسقط يسقط الخاين
اللى نهبنا وخلانا للكل نتداين
اللى خلنا فرجة للدنيا فى كل المداين
عرفت إنى دول هم الفاهمين
والبشوات بتوعنا هم التعابين
على عينى أرفع عصايتى على الأمرا الطيبين
مغصوب أنا أضرب و أطاوع المجرمين
بكيبورد : أشرف شعبان
