1- الشعب يريد
الشعب زهق من كتر الكلام
واللى يصطبح بيه, عليه ينام
وعود فارغة وتجار أوهام
وخراب بينشع فى كل الزمام
الشعب يريد القضاء على اللئام
الشعب يريد إسقاط النظام
2-مش هانمشى هو يمشى ومايحكمشى
مش هانمشى دى بلدنا وفيها قاعدين
على حبها كبير وصغير متواعدين
نضحى بروحنا ولا نسمع لها أنين
وبدمنا نفديها لغاية يـوم الدين
3-ارحل يعنى امشى
ارحل يعنى امشى وكفاية
تعبنا من الظلم والجباية
وإفهم بقى أصول الحكاية
ده الذل مهما طال لابد من نهاية
4-يسقط يسقط
يسقط يسقط الكدب والخداع
يسقط يسقط كل اللى خان و باع
يسقط يسقط اللى أكل وشعبه جاع
يسقط يسقط الى نام واهله ليلهم اوجاع
5-يامحمد قول لبولس
قوله ايدى ويا ايديك سقفتنا أعلى
صوتى مع صوتك غنوتنا أحلى
قلبى على قلبك عدونا يخزى
بدماغى ودماغك بلدنا أزهى
6-الجدع جدع والجبان جبان
الجدع جدع و ثابت فى الميدان
راسه مرفوعة كما الفرسان
صرخته قوية فى وش الطغيان
بيزعق وينادى كفاية هوان
الجدع جدع والجبان جبان
وإحنا يا جدع بايتين فى الميدان
7-سلمية سلمية
سلمية سلمية من غير دم و خراب
من غير نار ودخان وضباب
سلمية يتجمع فيها كل الأحباب
افهمها بقى وإبعد ياغراب
8-ارفع راسك فوق
ارفع راسك فوق انت مصرى
قول للعالم مية نيلنا لسه بتجرى
قوله بلدنا فى دمنا بتسرى
قوله بطينتها السمرا محنى ضهرى
بكيبورد:أشرف شعبان
