فى برد الشتا الزمهرير
متجمعين لابينا باشا ولا غفير
يضمنا الشارع فى حضنه الكبير
و يدفينا سحلب من أم أمير
ليلاتى نتعاهد هانكمل السير
لاجل مانفك سلاسل وطنا الأسير
قائدنا عم جمعة والشهرة ابوعتمان
على دفعته كان برنجى النشان
وعلى كتفه اللواء معلق النيشان
زعقته قوية تلم كل الشجعان
كلمته كما الرمانة فى الميزان
حدوته فى كل ساحة وميدان
وسلاحنا صحبة حلوة لكل الجيران
رشاش محبة ومدفع حكاوى زمان
ترسانة نووى من الضحك المليان
و فى ايدينا الشوم والعصيان
رافعينها فى وش الخاين الجبان
لاجل مانحفظ الامن والامان
ونقول لمصر ماتخافيش على ولادك
إحنا قلوبنا مصبوغة برملك وترابك
و فى حبك دايبين وعاشقين سمارك
عهد علينا يابلدنا لتنولى مرادك
تفارقى العتمة وتستقبلى نهارك
وتسمعى الدنيا من تانى موالك
بكيبورد:أشرف شعبان
